I Revidert Nasjonalbudsjett 2008 er NVE føreslått styrka med 13.5 millionar, dette svarar til ein auke sakshandsamarkapasiteten av konsesjonssøknader på nærare 30 pst.  

Styrking og effektivisering av konsesjonshandsaminga i NVE har ført til at effektiv sakshandsamingstid for kvar sak dei siste åra er redusert, og talet på ferdighandsama saker per år aukar. Samstundes har det vore stor vekst i innkomne konsesjonssøknader, noko som har ført til auka etterslep. Ei ytterlegare styrking av kapasiteten er difor naudsynt. 

- Det finst ei rekkje gode initiativ og prosjekt innan fornyeleg energi i Noreg, seier Sande. Veksten i innkomne saker hjå NVE er eit godt teikn på dette. Det er viktig at desse får ei handsaming som både er forsvarleg og effektiv. - Kapasitetsauken vil føre til at fleire prosjekt innan mellom anna småkraft og vindkraft blir handsama, og at fleire av desse blir realisert, avsluttar Sande.